Kiwi-nuus Deel 1

Vrydag – 22 September 2006

09H00

Goeiemore

Dit het lente in ons tuin geword sonder dat ek dit agtergekom het. Toe ek vanoggend my kop by die venster uitsteek, sien ek die perskeboom is net een groot bloeisel….dit terwyl die nartjieboom nog oortrek is met yslike groot sappige nartjies.

Ek het vandag die wêreld se tyd om voor die rekenaar te kuier, danksy my briljante plan. Kinderarbeid is die sleutel tot ‘n suksesvolle huisskoonmaakdiens.Van kleintyd af moes die seuns hulle kant bring as daar gewerk moes word, hetsy in die tuin of in die huis. Hulle vrouens gaan dus eendag geseënd wees met mans wat kan kook, stryk en die hele toetie doen. Woensdagaand is nou amptelik Broomstix-aand in die Claassen-huishouding. Dinsdae trek jy ‘n kaartjie met jou werkies op en Woensdagaand word die hele huis sommer so tjoef-tjaf skoongemaak. Dit beteken dat ek my nou nie meer op my afdag hoef af te sloof nie. Die kaartjiestelsel werk soos ‘n bom, want die hele huis is in vyf ewe groot dele op kaartjies ingedeel en aangesien jy elke week ‘n ander kaartjie trek, word jou taak nooit vervelig nie. En nee, ons mag nie kaartjie uitruil nie.

Ek weet nie of julle almal die rumoer oor Koos Kombuis se nuutste liedjie gelees het nie. So ‘n paar maande gelede kom Pieter een aand by die huis met ‘n liedjie waarna ons moet luister… Koos Kombuis se F*kkol. Ons lê soos ons lag, want nie net is dit snaaks nie, maar alles waaroor hy sing, is ook waar. Toe ek nou lees van die groot ophef wat daar oor die liedjie gemaak word, skryf ek toe vir Koos Kombuis:

Hallo Koos

Ons is SA-Kiwi’s wat nou al 5 jaar in Nieu-Seeland woon. So 2 maande gelede daag my man toe hier by die huis op, baie opgewonde….. daar is ‘n nuwe liedjie waarna ons moet luister. Nog nooit so ‘n raak beskrywing van die waarheid gehoor nie. Ons is mal oor F*kkol en sing gereeld saam met jou hier Doer Onder.

Good on you

Ek het nie verwag om iets van Koos te hoor nie, maar so ‘n week later…

baie dankie vir die luister na ons probleme!

Koos

Ek kan nie glo mense gaan so tekere oor ‘n eenvoudige liedjie met slegs een kras woord in nie en intussen moor en roof die res van die bevolking dat dit goed gaan. Die nuutste twee moorde die afgelope twee weke in George het baie na aan ons geraak. Die een persoon het ons goed geken en die ander een was net om die hoek van my ouerhuis. Dit is dan wanneer jy ekstra hard vir jou mense in Suid-Afrika begin bid. Sulke tye gee jy nie om as mense van jou praat as lafaards en weghollers nie. Dan eerder Bang Jan as Dooie Jan.

SATERDAGOGGEND - 9-UUR

Ek het toe nie soos ek beplan het die dag voor die blikbrein spandeer nie, maar die hele dag in my pajamas op my nuwe banke wat ek vir Vadersdag ( ja, reg gehoor ) gekry het, met ‘n lekker sappige liefdesverhaal, spandeer. Soms is dit nodig om net heeltemal af te skakel van die wêreld daar buite.

Ons skool het gister vir twee weke gesluit. Marco en Reghardt het groot planne vir die vakansie - dit wissel van ekstra ure by New World, fliek, gym, die ewige rekenaar, maar nie ‘n woord oor skoolwerk nie. ‘n Mens sou nie sê hulle begin albei die eerste week in November met eksamen nie. Marco het hierdie week vir hom bokshandskoene gekoop - nie om Reghardt reg te sien nie. Die liefdesdriehoek is toe opgebreek. Die broers is nou weer “single” en die atmosfeer in die huis is weer herstel. Marco se beste vriend van laerskooldae af is ‘n bokser en dit lyk asof die gogga Marco ook nou gebyt het.

Die kinders het Mufti-dag of soos ons in SA gesê het Civvie-dag, by die skool gehad. Dit is toe dat ek gehoor het dat “transformers” ook iets anders kan wees as net ‘n toestel wat iets met krag te doen het. Aangesien ons matrieks nie uniform skool toe dra nie, trek hulle “anders” aan as die res van die skool die dag met gewone klere skool toe kom. Hierdie keer was die tema enigiets wat met ‘n T begin. Reghardt en sy vriende het ‘n hele dag aan hulle uitrustings gewerk en die drie Transformers was ‘n groot “hit” by die skool. (Reghardt is die een in groen) Onderwysers en maats wou almal saam met hulle op ‘n foto wees. Reghardt het al van kleintyd af gesorg dat hy die prys wen vir die beste kostuum as daar die dag uit die storieboeke aangetrek moet word. Die Transformers is glo een of ander animasieprent op TV.

Vir diegene wat nie weet nie: Die dele in die brief wat ondertreep is, bevat ‘n foto. Jy moet net op die onderstreepte deel kliek en dan sal die foto oopmaak. Jy moet egter die brief aanlyn lees om dit te kan doen.

Die briefie word alweer ‘n bietjie aan die lang kant. Daar is mense wat nie van die té lang briewe hou nie. Nou deel ek dit maar in hoofstukke op.

Tot netnou

Anna-Maré