Goeie nuus

More Almal

 

Maandagoggend het net soos enige ander Bloumaandag begin... besig en nogmaals besig. Ek en Pieter het daarom besluit dat ek hom na werk in die stad sal kry en dan eers 'n bietjie gaan uit-"chill" met 'n koffietjie by Engela-hulle.

 

Kwart-oor-drie die middag is daar 'n kliënt om my te sien. Ek stap toe uit met een van daardie opgeplakte professionele glimlagte, want na 9 ure is my eie een al opgeglimlag. Daar staan Kerry toe met 'n ou by haar. Ek groet haar, loer na die ou wat in my seun se slaai krap en "smile" toe weer met haar. Iets omtrent die ou lyk toe so bekend dat ek weer na hom kyk...net om in daardie helder blou oë vas te kyk wat net aan een seun kan behoort!

 

Ek het daardie klomp meters om die toonbank vinniger afgelê as Bryan Habana met 'n rugbybal en sover ek gehardloop het, het ek gejil. Voor almal wat wou kyk en gekyk het, het ek die kind opgesoen. Hy moes eers Donderdagoggend hier land, maar het al maande gelede besluit om ons vroeër te kom verras. Hy het Sondag met Kerry gereël dat sy Maandag 1-uur by ons huis is, want hy wil haar bel. Hy het toe Maandagoggend 'n bus vanaf die lughawe gehaal tot in die stad en vandaar weer 'n volgende bus tot in Orewa. Toe sy dus 12-uur natgesweet van die Gym af by die huis instap, sit en wag hy haar in. So van die kind se planne om haar op te dollie vir die lughawe het daar toe niks gekom nie.

 

Marco en Reghardt het albei net met sulke groot oë gestaar. Nic was nog meer verras toe hy hulle sien, want nie net het hulle 'n hele paar sentimeters by hulle lengte gevoeg terwyl hy weg was nie, maar die Gym het ook vir hulle 'n bietjie skouers gegee. Ek dink dit is die skielike verliefdheid waarmee hulle twee gepla is wat hulle so laat uitsit het. Nog voor die einde van die jaar sit ek met 6 kinders by die huis, want Marco het reeds gevra of hy maar die naweek sy vriendinnetjie mag huis toe bring.

 

Nic en Kerry is toe saam om vir Pieter te gaan haal. Hy het Nic 'n paar keer vasgegryp en gedruk om seker te maak hy is terug.

 

Nic lyk soos iemand wat van 'n tropiese vakansie af kom, bruingebrand en ontspanne. Hy borrel oor van sy ervaring daar en het pakke foto's saamgebring  -  elke foto het sy eie storie om te vertel.

 

Nou het Nic 4 maande oor voor die universiteit weer begin en begin hy Dinsdag weer by sy vorige werk arbei. Hy jeuk nou om 'n ander voertuig te koop en hoop om sy eie motor aan Reghardt te verkoop. Reghardt het vir hom twee groot geel leerlingbestuurder-tekens gekoop en nou bestuur hy Nic se motor met sy broer langs hom om 'n ogie te hou.

 

Wou net graag ons goeie nuus met almal deel.

 

Lekker naweek vir almal.

 

Liefde

 

Anna-Maré