'n Vinnige Hallo

Hallo Almal

As ek reg onthou, het ek verlede jaar September laas 'n algemene
nuusbriefie gestuur. Die nuus het nooit opgedroog nie, die tyd om te
skryf het net al hoe minder begin word. Ek het darem al die nuus
weggebêre om julle later mee te bombardeer. Later begin more.

Dit gaan baie goed met ons almal, veral nou... Oupa en Ouma kuier hier
by ons vir 'n hele 6 weke!! Ek het ook 6 weke verlof geneem en Pieter 'n
maand. Ons het nou al 'n week se toer agter die rug en vertrek volgende
week noordwaarts met my pa en ma. Pieter gaan aan 'n 4-dag fietswedren
deelneem en ons is sy "support crew". Hierdie week is ons by die huis om
Oupa se bene 'n ruskansie te gee.

Dit was die 27ste Februarie my ouers se 50ste huweliksherdenking en ons
was bevoorreg om dit met hulle te deel. Ons het bo in die Sky Tower met
hulle gaan eet. Ek heg 'n foto's aan van Oupa en Ouma met die
kleinkinders, Oupa en Ouma wat 'n glasie klink en dan Pieter saam met
hulle. Daar is ook ene van my en my pa na die Blues-Sharks wedstryd. My
pa is 'n vreeslike groot Shark-ondersteuner en my bloed is potblou vir
die Blues, maar ons twee was ordentlik genoeg om nie handgemeen te raak
tydens die wedstryd nie. Dit is fantasties om vir die twee oumense die
land te wys. Hulle is nie meer vandag se kinders nie en die ou bene wil
ook nie meer aldag saamwerk nie, maar jy hoor hulle nooit kla nie. Hulle
kan net nie genoeg kry van alles wat ons hulle wys nie.

Ons het moreoggend 'n blaaskansie voor ek hulle na 'n ou "pub" in Puhoi,
'n klein boeregemeenskappie, neem. Dan gaan ek my eerste algemene
nuusbrief die lug laat sien.

Groete

Anna-Maré